Каратени бир тюрлюсюнден – онбир майдал

Адыгеяны Майкоп шахарында каратени бир тюрлюсюнден битеуроссей эришиу бардырылгъанды, анга къыралны 23 регионундан 700-ден аслам адам къатышхандыла. Анда Элбрус районну аскер искусстволаны «Барс-Тырныауз» академиясыны келечилери жетишимли болгъандыла, ала битеу да онбир майдал къоллу болгъандыла.

Кеслерини къауумларында Этезланы Адилгери, Ангелина Лазаренко бла Самийа Эминова эм кючлюле болгъандыла. Кюмюш майдалланы Алим Абушов, Салима бла Малика Эминовала алгъандыла, «доммакълагъа» Жолабланы Сафия, Хамид Алхасов, Умар Эминов тийишли болгъандыла.

Турнирде академияны баш тренери Этезланы Владимир да сермешгенди. Ол эки майдал бла къайтханды: «кумите санбон» бёлюмде «кюмюш» эм «дзю-кумитеде» - «доммакъ» бла.