Ишлемеген тишлемез, алай солургъа уа унутмагъыз!

Бирле ишчи заманда арымай-талмай кюрешип, кюнню ичинде толтурургъа белгилеген жумушларын барысын да этедиле ол угъай, эркин заманлары окъуна къалады. Башхаланы уа къарыулары жукъгъа да жетмейди, ала заманны созуп,  хайырсыз къаладыла. 

Бу къысха статьяда уа ишчи заманны зыраф этмей, жетишимли болууну жорукъларын билдирирге сюебиз. 

Саулукъну юсюнден сагъыш эт 

Эрттенликде кючден уянып, тёшекден туралмай, къыйналып,   къарыу жукъгъа да жетмей эсе,   саулукъну  юсюнден сагъыш этерге керекди.  Алимлени айтханларына кёре, россейлилени 20-25 процентин узакъгъа созулгъан арымакълыкъны синдрому  деген ауруудан къыйналадыла. Аны уа бу ышанлагъа кёре ачыкъларгъа боллукъду: адамны башы тёгерек айланады, къуру да ауругъанлай, жукъусу келгенлей турады,  кесекле тийгенча болады хали.

Бу ышанланы кесигизде тапхан эсегиз, терапевтге барыргъа, аны бла келиширге керекди. Ол керекли тинтиуле бардырып, неврологга ашырыргъа боллукъду. 

Кофе ичгенден сора сёлеширме…

Бирле артыкъда магъаналы, шёндю тамамларгъа керекли ишлени арт болжалгъа салыргъа ёчдюле: кофе ичгенден сора сёлеширме, киногъа къарагъандан сора ишлерме, деген сылтауланы айтып. Алимле быллай болумгъа  энчи ат  бергендиле – прокрастинация.

 Андан къалай къутулургъа боллукъду? Кесигизни алдап кёрюгюз.  Сёзге,   киногъа къарагъандан сора башларма ишлеп дегенни орунуна, жумушну   киногъа къарагъынчы бошарыкъма, деген буйрукъ беригиз кесигизге. Ол кезиуде битеу белгиленнген жумушланы бошап, сюйген сериалгъа тынч жюрек бла къараяллыкъсыз.

Дагъыда ишге болжал салыгъыз – 10-20 минут. Бу заманны ичинде   башха затлагъа эсигизни ахырда бёлмегиз. 20 минутну ичинде адам артыкъ бек арымайды, алай   ишни ахырына жетдираллыкъды.

Энтта бир амал -  90/30 эмда 52/17 техника. Аны къалай ангыларгъа боллукъду? Бир затха да бёлюнмей, 90 (неда 52) минутну ишлейсиз, ызы бла уа 30 (неда 17) минутну солугъан этесиз. Жарым сагъат а ауузланыргъа, киногъа къараргъа да жетерикди. Ишчи кезиуге бла солуугъа берилген заманны бузаргъа жарамайды, ол артыкъда магъаналыды.

Кюнню  тизмесин къурагъыз

Женгил, уллу къыйын салыуну излемеген жумушха бирде кюнню жарымы кетип къалгъанын эслеген болурсуз.

Аллай болумгъа тюшмез ючюн, кюнню ичинде  толтуруллукъ ишни  тизмесин къурагъыз. Сёзге, ингирде оюмлап, тамбла къаллай жумушла этерге кереклисин жазыгъыз къагъытха. Эрттенликден а аны толтуруп башлагъыз. 

Аллай тизмени ыйыкъгъа къураргъа да боллукъду.   Хау, арт болжалгъа салыргъа жарамагъан жумушла чыгъып да къалыучудула, ол кезиуде тизмени тюрлендирирге боллукъду. Алай асламын а белгиленнген заманда тамамларгъа кюрешигиз, ол кезиуде ишчи ыйыкъ хайырлы боллукъду.

Болжалланы, эсеплени унутмагъыз

Биринчилени санында толтурургъа керекли эмда арт болжалгъа салыргъа жараулу ишлени айыра билиу  да магъаналыды. Тамата буйрукъ бергенлей, бирле анга жан атадыла. Алай андан да магъаналы ишни жууукъ заманда бошаргъа  кереклисин, сёзге, жылны жарымында толтурулгъан ишлени эсеплерин,  унутуп къоядыла. Алай бла артыкъ керек болмагъан иш битди, отчёт а жокъ. Ол а иш бериучюню ачыуландырмай къоярыкъ тюйюлдю.

Аны ючюн буйрукъланы, жумушланы магъаналыкъларына кёре сайлай билирге тийишлиди. Алимле бу кезиуде Эйзенхауэрни матрицасы бла хайырланыргъа кереклисин айтадыла. Ол тёрт бёлюмден къуралады: «Артыкъ да магъаналы эм терк толтурургъа керекли», «Артыкъ да магъаналы, алай толтурургъа заман болгъан», «Терк бошаргъа тийишли, алай артыкъ магъаналы болмагъан» эмда «Артыкъ магъаналы болмагъан эм арт болжалгъа салыргъа жараулу».

Битеу  жумушланы бу тёрт бёлюмге юлешип, тизмени тюз къурасагъыз, ишде хайырлылыкъгъа кёре сизге жеталлыкъ  адам боллукъ тюйюлдю.

Иги ышаннга ушамайды

 Бирден кёп ишни башлагъанны кёпле иги ышаннга санайдыла. Алай ол сизге угъай, башха адамлагъа хайырлыды. Эсигиз алагъа барысына да жетерик тюйюлдю,  бир магъаналы затны унутуп къояргъа къоркъуу уллуду.

Аны ючюн   жумушланы бирден угъай, бири бири  ызындан толтургъан хайырлыды: бирин бошагъанлай, жангысын башлап. Аны бла бирге уа солургъа, ашаргъа, суу ичерге унутмагъыз.  Ансыз, башында айта келгенибизча,  узакъгъа созулгъан арымакълыкъны синдрому  сизге да жетерикди.