Инфляция азая барады

Аш-азыкъ продукцияны ёлчеми кёбейгени, уллу тюкенле да мадар этип башлагъанлары себепли Къабарты-Малкъарда инфляция азайып башлагъанды. Аны юсюнден Миллет Банкны регионда бёлюмюнде айтхандыла, дегендиле КъМР-ни Башчысыны эмда Правительствосуну пресс-службасында.

Быйыл январьда КъМР-де инфляция 6,8 процент эди. Шимал-Кавказ федерал округда ол - 8,07, саулай къыралда уа 7,44 процентге жетгенди.

Республикада нашаланы эмда бадыражанланы багъаларыны ёсюую тохташыракъ болгъанды. Анга производство кёбейгени эмда теплицалада тахта кёгетле кёбюрек ёсгени этгенди себеплик. Тузланнган эмда консерва этилген кёгетлени багъалары да тюшгендиле. Банк аны сылтауун былтыр тирлик бай болгъанында эмда заводла игирек къармашып башлагъанларында кёреди. Завод дегенде, консервала чыгъарыу жаны бла Къабарты-Малкъар республика битеу къыралда окъуна ал жерледен бирин алады.

Тауукъ жумуртхаланы, алтындан бла кюмюшден этилген затланы, аякъ эмда юс кийимлени, бытовой техниканы талай тюрлюлерини багъалары да алгъынча алай ёсмейдиле. Бирлерин асламыракъ чыгъарып башлагъандыла, башхаларын а, терк сатарча, тюкенле багъаларын азайтадыла.

Саулай къыралда болумгъа къарагъанда, январьда инфляция хазна тюрленмегенди, 7,4 процентлей къалгъанды. Россейни Банкыны тергеулерине кёре, быйыл ол тюшюп, 4-4,5 процентге жетерикди, артда уа тёрт процент чакълы боллукъду.