Бизнесни женгил ачарча

Федерал налог службаны сайтында «Старт бизнеса онлайн» деген сервис ишлеп башлагъанды. Ары кирип, энчи предпринимательни неда компанияны эсепге салыргъа, электрон къол салыуну жарашдырыргъа, банкда счёт ачаргъа боллукъду. Аланы этерча энди къырал органлагъа неда финанс организациялагъа барып турургъа кереклиси жокъду, деп билдиргендиле ФНС-ни КъМР-де Управлениясындан.

Бу сервис бир жылны ичинде сынам халда ишлерикди. Ызы бла ФНС, аны эсеплерине къарап, Россейни Правительствосуна отчётун кёргюзтюрюкдю. Бизнесни ачаргъа эмда айнытыргъа къаллай жумушла керек болгъанын да артда жик-жиги бла тохташдырлыкъдыла.

Шёндю уа анда энчи предпринимательча эсепге турургъа, чекленнген жууаплылыгъы болгъан общество (ООО) ачаргъа амал барды. Аны этерча Госуслуги порталгъа кирирге эмда Бир биометрия системада эсепде болургъа керекди.

Бизнесни регистрациясын этерге изленирик къагъытланы жарашдыргъынчы, биринчиден банкны сайларгъа тийишлиди. Анда счёт ачып, электрон къол салыргъа эркинлик да берип, документлени бу сервис бла жиберирге керекди. Бу проектге шёндю ВТБ, Газпромбанк, ПСБ эм Сбербанк къошулгъандыла. Сервисни юсюнден толу информацияны https://www.nalog.gov.ru/rn77/promo/start/ сайтда табарыкъсыз.

 

Улбашланы Мурат хазырлагъанды.
Поделиться: