Элбрусда больницагъа газ тартылгъанды

Багъыу учреждение Элбрус элдеди. Ол кеси да 1775 метр бийикде орналыпды. Жангы больница ол тийреде жашагъан беш минг чакълы инсанны эмда туристлени медицина жаны бла жумушларына къарарыкъды. Солургъа уа Минги таугъа жыл сайын эм азындан жарым миллион адам келеди.

Больницаны газ ызгъа къошарча «Газпром газораспределение Нальчик» компанияны специалистлери 118,5 метр быргъы созгъандыла. Аны кесинде уа эки котёл орнатхандыла.

Жангы мекям эки жылны ичинде ишленнгенди. Аны къурулушу «Саулукъ сакълау» миллет проектни чеклеринде бардырылгъанды. Больница шёндюгю оборудование бла жалчытылыныпды, жумушла уа анда эм бийик стандартла бла берилликдиле. Газ келгени себепли аны жылытыу бла бир тюрлю чурум боллукъ тюйюлдю, дегендиле компанияда.

Больницаны ачыу эмда ары газ жибериу жумушха РФ-ни Правительствосуну Председателини орунбасары Александр Новак, КъМР-ни Башчысы Казбек Коков эм «Газпром межрегионгаз Нальчик» компанияны башчысы Залим Вороков къатышхандыла.

Улбашланы Мурат хазырлагъанды.
Поделиться: