КъМКъУ – тамблагъы кюнню университети

Кёп болмай  Къабарты-Малкъар къырал университетни  Элбрусда билим бериу-илму арасында  проект-аналитика сессия бардырылгъанды. Анга  «Социоцентр» федерал къырал автоном илму учрежденияны экспертлери, университетни ишчи  къаууму да къатышхандыла. Аны чеклеринде  «Приоритет 2030» стратегиялы программаны чеклеринде КъМКъУ-ну   къыйматлы проектлери сюзюлгендиле.

Социоцентрни»  экспертиза эм  сеть жаны бла байламлыкъ къурау бёлюмюню экспертлери  Виктория Бучацкая, Евгений Муханов эм  Алексей Кузьмин  университетни иши бла  шагъырейленнгендиле. Ол санда илму аралада,   лабораториялада эм башха бёлюмледе  болгъандыла. 

 Тюбешиуню ача, «Приоритет 2030» программаны юсюнден толуракъ вузну илму-излем жаны бла проректоруну къуллугъун толтургъан   Светлана Хаширова докладын окъугъанды.   Аны чеклеринде билим бериу, илму-излем, кадрла, жаш тёлю, цифралы технологияла, финансла эм башха темала  да кётюрюлгендиле.   Программа вузну иги жанына  тюрлендириуде, регионну социал-экономика бёлюмюн айнытыуда да уллу  къошумчулукъ этгени белгиленнгенди. 

Бюгюнлюкде КъМКъУ-ну къыйматлы проектлеринден бирине  полимер  аддитив  технологияла жарашдырыу бла байламлы араны санаргъа  боллукъду. Аны ишини юсюнден лабораторияны  тамата илму ишчиси Курданланы Жанна презентация бардыргъанды.

 «Къабарты-Малкъарны  экология, инновация эм   реабилитация медицина жаны бла»  къыйматлы проектни юсюнден а    менеджмент, туризм эм къонакъ алыу индустрияны  институтуну тири  айнытыу жаны бла араны таматасы  Зураб  Берелидзе хапарлагъанды. Ызы бла «Эрмитаж-Кавказ» проектни юсюнден а  «Эрмитаж-Кавказ КБГУ» араны таматасы  Альберт Саральп билдиргенди.

Сессияда кётюрюлген шартла, иги жанына тюрлениуле «Социоцентрни» экспертлерини бла КъМКъУ-ну трансформация къауумуну  проект-аналитика ишлерини мурдоруна киргендиле. Университетни  ишчи къауумуна   бёлюмлени, илму араланы,      лабораторияланы таматалары эм башхала киргендиле.  Мында «КъМКъУ бюгюнлюкде», «Жетишимге итиниулюкде чырмаула» эм  «КъМКъУ-2030 – тамблагъы кюнню университети» деген темала кётюрюлгендиле. 

- Бусагъатда «Приоритет 2030» программагъа кёре КъМКъУ  магъаналы проектлени хазырларгъа эм бардырыргъа таукелди.  Аны бла байламлы биринчи атламлары эм жетишимлери да барды. Болсада  бюгюнлюкде  айырмалыкъларын кёргюзтюрге, айныуну жолун белгилерге эм андан таймай  барыргъа кюреширге  тийишлиди. Университет республикада  билим бериуню  эм илмуну айнытыу  жаны бла да алчы болургъа итиннгенин эрттеден ачыкълагъанды. Анга кёре фахмулу алимлени жыйгъанды, жангы технологияланы эм башха амалланы  хайырланады. Быллай  сессияла уа  проетлерин хазырлауда, алагъа экспертлени  кёзлери бла къараргъа болушадыла,-дейди   «Социоцентрни» эксперти Евгений Муханов.

Эсге сала айтсакъ, КъМКъУ полимер аддитив  технологияла жаны бла къыралда алчыланы санына киреди. Бусагъатда окъуна  ол кёп бёлюмню айнытыргъа болушурукъду. 

Университетни фахмулу алимлерини  сейир ишлерине бизнесни келечилери да  эс бурадыла, инвестиция этерге хазырлыкъларын  да билдиредиле.  Алай бла КъМКъУ саулай къыралда окъуна полимерледен абериле жарашдырыуда  кесини энчи  жерин табарыгъы баямды. 

Ишчи программагъа кёре, алимле бла экспертле  «Тинтиуле бла разработкаланы коммерциализациясы»,  «Адамлагъа оноу эте билиу», «Университетге оноу этиу жаны бла система», «Билим бериу политика» эм «Стратегиялы проектле» деген темала бла байламлы  тренинглеге къатышхандыла. Аланы  кезиуюнде  проектлени бардырырча «жол карта» хазырлагъандыла эм башха мадарлагъа да эс бургъандыла. 

 - Университетни келечилерине стратегиялы проектлени хазырларгъа  болушханлары ючюн «Социоцентрни» экспертлерине  жюрек ыразылыгъымы билдирирге сюеме.  Сёзсюз,  «Приоритет 2030» – жаланда бир тюрлю файда, проектле  бла чекленип къалмайды. Анга кенг къараргъа керекди, ол  тамблагъы кюнюбюздю. Ол себепли  вуз  2030-40 жыллада  тамамларча  борчла салынадыла. Бюгюннгю форум ахшы  муратларыбызгъа  элтген  атламладан бириди, - дегенди  Юрий Альтудов.

Ахырында  проект-аналитика  сессиягъа къатышханла эм  экспертле да бирден  Къабарты-Малкъар къырал университет алчы вузладан бири болуруна уллу ышаныулукълары болгъанын ачыкълагъандыла. Аны  айнытыуда къыйматлы проектлеге къаралгъанын,  аланы бардырырча  онгла да  сюзюлгенлерин  къошхандыла.

Курданланы Сулейман.
Поделиться: