Тенгиз Калдани – Россейни спортуну устасы

Ленинград азатланнганлы 75 жыл толгъанына аталып, Санкт-Петербургда каратеден "Невский факел" деген XXX битеуроссей турнир къуралгъанды. Анга къыралны 25 регионундан тюрлю-тюрлю жыл сандагъы 900-ге жууукъ спортчу къатышхандыла.

Эришгенлени араларында Элбрус районну олимпиада резервли спорт школундан  Тенгиз Калдани да болгъанды, ол абадан къауумда 84 килограммдан аслам ауурлукъда сермешгенди. Тенгиз тёрт тюбешиу бардыргъанды, эм аланы барысында да 6:0, 4:0, 5:1 эм 5:2 эсепле бла хорлагъанды. Жангыз да финал сермешни аллында жерлешибиз хорлатыр деген къоркъуу чыкъгъанды, алгъа 0:2 эсеп бла къытдырып башлагъан эди. Алай артда беш балл алып, алгъа чыкъгъанды эм бу кёрюмдюсю бла Россейни спортуну устасыны нормативин  толтургъанды.

Арт кезиуде бу Тенгизни экинчи уллу жетишимиди, ары дери ол Гомель шахарда халкъла аралы турнирде беш къаршчы спортчуну къытып хорлагъан эди.