Жигит лётчикни хурметине – фильм, алгъышлаула, концерт

Нальчикде Къырал концерт залда Сабанчыланы Арипаны «Мени атамы юсюнден айтыгъыз» деген документли фильми кёргюзтюлгенди. Ол Совет Союзну Жигити Балтиканы тенгиз авиациясыны лётчиги Байсолтанланы Алим туугъанлы  100 жыл толгъаны бла байламлы алыннганды. Аны баш жигити Алим Юсуфовични жашы Валерийди, ол атасыны  кишилигини, аны саугъаларыны, энчи жашаууну юсюнден билдиреди,  аны бла бирге къуллукъ этгенле бла тюбешиулерин эсгереди. 

Сабанчыланы Арипа айтханнга кёре, фильм Байсолтанланы Валерийни башламчылыгъы бла алыннганды. Кёп жылланы шош тургъанындан сора, ол атасыны юсюнден толуракъ билдирирге сюйгенди. «Биз Байсолтанланы Алимни аны жашыны кёзлери бла кёрлюкбюз, ол кеси да аны ызы бла баргъанды, 30 жылны авиацияда къуллукъ этгенди. Кёп заманны ичинде жашырын турургъа борчлу болгъанды, бюгюнлюкде уа, Алим  туугъанлы 100 жыл толгъаны бла байламлы, ол шошлукъну бузаргъа таукелленнгенди. Аны ючюн фильм сейирди», - дегенди ол.  

Презентациягъа кёп адам келгенин, ала барысы да залгъа сыйынмагъанларын окъуна белгилерчады. Жыйылгъанланы КъМР-ни Парламентини башчысыны орунбасары Жанатайланы Салим алгъышлагъанды. Ол, Байсолтанланы Алимни жигитлигине ыспас эте, аныча уланларыбыз ёсе келген тёлюлеге ахшы юлгю кёргюзтгенлерин белгилегенди. Алгъышлау сёзлени Ёлмезланы Абдул-Халим да айтханды. Ол, Гузойланы Асхат, Хаджиланы Азнор бла Геляхланы Султан, Алим туугъанлы 100 жыл толгъанына атап, аны суратын да алып, Минги таугъа ёрлегендиле. «Бу жыл къарлы болгъанды. Чегем эм Бахсан ауузлада эки таугъа Жигит Алимни аты берилипдиле, алай къар кёп жаугъаныны хатасындан алагъа барыргъа къоркъуулу эди. Аны ючюн, кюнню халына да къарамай, Минги тауну сайлагъанбыз. Жел да къаты ура, сууукъ эди, ол кезиуде бизден сора ары киши чыгъалмагъанды», - дегенди къаячы.

Алгъышлау, хурмет сёзле айтылгъандан сора, жарыкъ концерт болгъанды. Тепсеулери, жырлары бла «Балкария» къырал фольклор-этнография тепсеу  ансамбль, «Эрирей», къауум, Текуланы Амур, Тёппеланы Алим, Бапиналаны Зариф, Таукенланы Салим, Жаникаланы Элдар, Атмырзаланы Элдар эм башхала къууандыргъандыла. 

Хабибуллахланы Зульфия.