Жангылыкъла

Быйыл 15 апрельден башлап  «Победа»  авиакомпания «Нальчик- Москва» маршрут бла къошакъ рейс ачады. Аны  юсюнден КъМР-ни Транспорт эмда жол мюлк министерствосуну  пресс-службасындан билдиредиле. 

Быйыл жылны  экинчи кварталында «Къабарты-Малкъарны маданияты» регион проектге кёре, Эл-Тюбюнде халкъ назмучуну – Къулийланы Къайсынны ата юйюне, музейге тынгылы ремонт этилликди.
 

Жууукъ заманда  «Иги шахар болум къурау» федерал проектни чеклеринде   эм битеуроссей конкурсда хорлагъанлары ючюн берилген грантха  Чегем шахарны бир къауум жеринде - Кяров, Надречная орамлада игилендириу ишле башланырыкъдыла.  Аны чеклеринде район аралы больницаны, бир къауум кёп фатарлы жашау журтну  арбазларына эм Чегем сууну жагъасыны бир кесегине  къараллыкъды.

Чегем шахар энтта да  «Гитче шахарчыкълада бла  элледе иги болум къурау» деген битеуроссей конкурсха  къатышыр муратлыды. 

Кёп болмай Чегемде  Ата журтну къоруулаучуну кюнюнде жер-жерли власть органланы,  ич ишлени,  билим бериу  учрежденияланы,  предприятияланы, жамауат организацияланы келечилери эм башхала да къатышып  Уллу Ата журт урушда жанларын-къанларын аямай  къазауат этгенлени эсгертмесине гюлле салгъандыла. 
 

Къабарты-Малкъарда «Къоркъуусуз эм тынгылы автомобиль жолла» миллет проектге кёре иги кесек иш этилгенди. Бюгюнлюкде аны чеклеринде регион эм  район магъаналы жоллагъа эм кёпюрлеге да   тынгылы ремонт  бардырылады.   

«Къоркъуусуз эмда  качестволу жолла» деген миллет проектге тийишлиликде  Черек районну Жемтала элини ара орамыны  жолу тап халгъа келтирилгенди.

2023 жылда Къабарты-Малкъарда онжети жылларына дери  сабийлери болгъан  150 минг ата-анагъа бир жолгъа тёлеу пособияла берилгендиле. Аланы алыр ючюн, ата-ана, сабий да Россей Федерацияны инсанлары болургъа керекдиле.

Кёп болмай Къабарты-Малкъар къырал аграр университетде эл мюлк илмуланы доктору, профессор Пётр  Лучковха аталып халкъла аралы илму-практика конференция ётгенди.   Анга чакъырылгъан сыйлы къонакъланы санында КъМР-ни эл мюлк министрини орунбасары  да болгъанды.

Къабарты-Малкъарда«Агропромышленный комплексни продукциясыны экспорту» федерал проектге эм «Россейни мелиорация комплексин айнытыу»  ведомстволу программаны хайыры бла эл мюлкге бёлюннген жерлени алты мингинден артыгъында  сугъарылырча мадар этилгенди. Къыйматлы ишни бардырыугъа Басхан районда да аслам эс бурулады.