Аурууларын унутдургъан докторНальчикде Кешоков орамда биринчи номерли поликлиникада ишлейди Бёзюланы Асхатны къызы Лариса. Ол врач-терапевтди. 2000 жылда Нальчикде Къабарты-Малкъар къырал университетни медицина факультетин бошагъанды. Андан сора ишчи жолу башланады. Алгъа республикалы больницада врач-терапевт болуп юч жыл урунады. Анда иги сынау алгъандан сора, студентлени поликлиникасына кёчеди. Анда тамата врач болуп алты жыл кюрешеди. Асламысында окъуу юйню устазларыны, окъуучуларыны саулукъларын тинтгенди. Бир ненча замандан ол жангыдан биринчи ишине къайтады. Бу жол Урван районну ара больницасына ишге киреди. Анда врач-терапевт болуп юч жыл уруннганды. Къыйын саусузу болса, аны да жокъ эди тынчлыгъы. Андан Нальчикге келеди, шахарны биринчи поликлиникасына. Кюн ортагъа дери саулукъларын тинтдирирге келгенлеге къарайды. Андан ингирге бу учрежденияны кюндюзгю больницасында врач баш жумушун бардырады. Лариса бакъгъан саусузладан бири Къадырланы Зухура айтады: «Мени жыл санымда аурумагъан ким барды? Жюрегим да чанчыр, къаным да кётюрюлюр, белим да аурур, башхаларын санамай къойсам да. Къайсын айтып, къайсын къойгъун? Къауум жылдан бери уа Ларисагъа жюрюйме. Жангыдан саулугъуму тинтдиреме. Сора мында ол буюргъан багъыуну этедиле. Кюндюз бери келеме, ингир ала юйюме кетеме. Доктор кюннге эки-юч кере халими соргъанлай турады. Алай бла бери эки ыйыкъ жюрюйме. Андан сора аурууларымы да унутама, санларым да женгил боладыла. Бек къууанып кетеме. Бир жылдан дагъыда къайтыучума. Врачым манга бет жарыкълы тюбеп, толу хапар сорады. Ариу тилли, сабыр адам. Аны сёзю да дарманды». Хасаниячы къыз окъуугъа киргенде, аны кесинден да бек къоншулары къууаннган эдиле: «Энди кесибизни докторубуз боллукъду, поликлиникала, больницала излеп айланырыкъ тюйюлбюз», - деп. Кертиси бла да, ол жашагъан тийреде абадан, сабий ауруса да, алгъа Ларисагъа келедиле. Ол да не зат этерге керек болгъанын тынгылы айтып ангылатады. Аурууланы, саусузланы юслеринден ушакъ бардыргъан кезиуде кеси уа былай дейди: «Бек уллу насып – ол саулукъду. Адам аны алгъадан сакъларгъа керекди. Бек алгъа къайгъыладан, сууукъдан. Андан сора уа, бир затынг къыйнамаса да, жылгъа бир кере окъуна врачлагъа келип, саулукъну тинтдирирге. Сора бир-бирле жангы дарманланы хапарларын эшитип, кеслери кеслерине багъып тебирейдиле. Ол керек тюйюлдю. Багъыуну башлардан алгъа аурууну тюз тохташдырыргъа керекди. Аны уа саулукъ сакълау учреждениялада этедиле. Дагъыда бир затха эс бурайыкъ: биреуге жарагъан дарман башхагъа келишмей къалыргъа да боллукъду. Ол эсде болсун». Биз хапарын айтхан врач бакъгъан саусузларындан ариу алгъышла эшитгенди. Алгъаракълада уа ол башха ишге кёчгенди.
Поделиться:
Читать также:
17.05.2024 - 11:15 →
«Тауланы таза суулары – бизни байлыгъыбыздыла»
16.05.2024 - 15:55 →
Саулукъгъа сакълыкъ-узакъ ёмюрню мурдору
16.05.2024 - 09:42 →
Жетишимли таулу къыз
02.05.2024 - 08:30 →
«Къан басымыгъыз мардада тутурча, бир затха асыры бек къууанмазгъа неда къаты ачыу этмезге кюрешигиз»
25.04.2024 - 11:00 →
Жаз башында бютюн бек къозгъалады
|