Бахчаланы буздан къорууларгъа – 40 миллион сом

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю. Ол былтырдан эсе 10 миллион сомгъа кёпдю.  Аны юсюнден бизге  Эл мюлк министерствону пресс-службасындан билдиргендиле.    

Бюгюнлюкде Къабарты-Малкъарда буз булутланы чачхан  37 энчи пункт ишлейди.  Ала  бла  къорууланнган жерле 481,4  минг гектаргъа жетедиле. Тийишли ишлени бардырыр муратда КъМР-ни Эл мюлк министерствосу  Шимал-Кавказ аскер  служба бла келишим этгенди.

Белгилисича, Къабарты-Малкъар, буз уруп халеклик салыргъа къоркъуу уллу болгъан регионладан бирине  саналады. Болсада энди жангы мадарланы хайыры бла эл мюлк жерлени  табийгъатны кючюнден сакъларгъа  онг табыллыкъды.

Республикада буз урургъа къоркъуулу заманнга жаз башы бла жай саналадыла. Ол себепден,  биринчи апрельден башлап, пунктланы  барысында да дежурство бардырылады.

Аны бла байламлы бу кюнледе окъуна  Шимал-Кавказ аскер служба керекли затланы хазырлыкъгъа келтиргенди.