Черек жагъала таза болурча

Солуу кюнде «Экология» миллет проектге кирген «Сейир суу объектлени сакълау» федерал проектге кёре, «Россейни суулары» деген экология акция ётерикди. Аны магъанасы черек жагъаланы кир-кипчикден тазалап, тап халгъа келтириргеди.

Субботникге къатышыргъа республиканы эллерини барында да ыразылыкъларын билдиргендиле. Ол себепден Чегем, Черек, Малка, Басхан, Урван, Терк, Аргудан, Урух, Лескен эм Золка сууланы жагъаларында эм башха объектлени тийрелеринде да   тийишли ишле барлыкъдыла.  Аны бла бирге билим бериу учреждениялада «Суу – жашауну тутуругъу» деген аты бла экологиядан ачыкъ дерсле боллукъдула. 

КъМР-ни Табийгъат байлыкъла эмда экология министерствосу ыйых кюнде министерстволаны, ведомстволаны, жаш тёлю эм экологиялы организацияланы келечилери, волонтёрла эм башхала да къатышып, шахарны узуну бла Нальчик сууну жагъаларын тазаларыкъдыла.

Жай кезиуде былайлада жерлешлерибиз эм къонакъла да солургъа бек сюедиле. Жарсыугъа, бир-бирле эссизлик этип, ызларындан кир-кипчикни жыймай кетедиле. Ол табийгъатха заран жетдиргенден сора да, кёзге бек эриши кёрюнеди.

Акцияны магъанасы, артыкъ кере   жамауатха сууну багъалыгъын билдирирге, ансыз жашау болмазлыгъын, аяулу кёзден къараргъа, ёсе келген тёлюлеге сакъларгъа тийишлисин ангылатыргъады. 
Анга ким сюйсе да къатышыргъа боллукъду.  Келирге сюйгенле «Трек» кёлню къатында 10:00 сагъатда жыйылып башларыкъдыла.