Жаралы аскерчиле саулукъларын кючлерча

Къабарты-Малкъарда энчи аскер операцияны кезиуюнде ауур жаралы болгъан аскерчилеге аталгъан спорт проект жашауда бардырылады, деп билдиредиле республиканы Спорт министерствосундан.

Аны бла байламлы «Ата журтну къоруулаучулары» къырал фондну жер-жерли бёлюмюнде аскерчилени, министерствону келечилерини, врачланы эм психологланы къатышыулары бла жыйылыу болгъанды. Бюгюнлюкде регионда алгъан жараларындан сора сакъат болгъан 27 аскерчи бардыла. Сагъынылгъан программагъа кёре аланы саулукъларын спортну юсю бла кючлерге белгиленеди, аны чегинде къаллай ишле тамамланырыгъыны юсюнден аскерчилеге да айтылгъанды.

Ызы бла министерствону спорт-адаптив школунда аскерчилеге мастер-класс ётдюрюлгенди, ала кеслерин атлетиканы ауур эм женгил тюрлюлеринде, армрестлингде бла пауэрлифтингде сынагъандыла, садакъдан атдырып, копьёну атып да кёргендиле. Проектни экинчи кесегин толтуруугъа уа республиканы спорт учреждениялары да къатышадыла, алада аскерчилеге жараула къураллыкъдыла. Фондну бёлюмюню башчысы Муаед Дадов белгилегенича, аланы ишлерини баш борчларындан бири аскерчилеге спортну эм физкультураны болушлукълары бла жамауат жашаугъа жангыдан къошулургъа, саулукъларын кючлерге болушлукъ этиудю. Аны бла байламлы спорт министрни орунбасары Аналаны Аслан регионда сакъатлыкълары болгъан адамла жарау эталырча онгла къуралгъанларын айтханды. «Ауур жаралы болгъанларындан сора саулукъларын тюзетип, ветеранла спорт-адаптив школда юйренедиле, жарау-этиу жыйылыулагъа барадыла, эришиулеге къатышадыла, хорлап да къайтадыла», - дегенди ол.