Атасыны ызы бла

Школгъа устаз болуп ишлерге бирле сюйюп, экинчилери башха амал болмай, ючюнчюлери да бир тюрлю  сылтау бла келедиле.  Мени бюгюннгю жигитим а бу усталыкъны кеси да билмей тургъанлай сайлагъанды. Аны атасы Мечиланы Хаким  кёп жылланы Хасанияда 16-чы номерли орта школда устазлыкъ этгенликге, атасыны къарындашы Малик а директор болуп тургъанлыкъгъа, къыз медицинагъа барса сюе эдиле. 

Ол а, аланы айтханларындан чыкъмай,  окъууун алтын майдалгъа бошагъандан сора, документлерин медицина факультетге хазырлагъан эди. Алай экзаменле болур кюн аппасы ёлюп,  алагъа баралмай къалады. Артдаракъда уа КъМКъУ-ну  химия эм биология факультетине къагъытларын берирге жетишалады. Биринчи экзаменде окъуна «беш»  алып, университетге киреди.  

Аны бир адам  чурум тапмазча жетишимли бошагъанды. Андан сора Нальчикде 5-чи номерли орта школгъа ишлерге киреди. Алай анда кёп турмайды, бир кесекден  туугъан элине, юйюне жууугъуракъгъа, 16-чы номерли мектепге   келеди. Ол 2001 жылда болгъанды. Андан бери  аны къолунда окъуп чыкъгъанланы санап чыкъгъан  къыйынды. 

-Мен башхаланы сынауларына да бек къарайма, алай кесими да энчи амалым барды. Химия къыйын предметди, хар кимге да тынч берилип къалмайды, ол себепден аны окъуучула ангыларча, сюерча къураргъа кюрешеме дерслерими. Сегизинчи классчыла,  алгъа къоркъаракъ бола эселе да, 11-чи классха жетгенде уа, Менделеевни таблицасын  иги биледиле, бир бирлерине аны бла байламлы чам, лакъырда атла да атайдыла. Ол алай бла да къалады аланы эслеринде,-дейди устаз. 

Биологияны юсюнден айтханда уа, окъуучулары тюрлю-тюрлю конкурслагъа  тири къатышып, кёп кере алчылыкъны алгъанларын айтсакъ да тамам сунама. Ол юйретиу ишге да уллу магъана береди. Окъуучулары  билимли да, адепли да  болсала сюеди. Ол жаны бла  къыйыны зырафха кетмегенди. Бир жол   школда кенгеш болуп, ары битеу шахарны окъуу юйлеринден къонакъла келгендиле.  Барысы да бу мектепни окъуучуларыны   низамлылыкъларын, эриши, ушагъыусуз сёзле айтып эшитмегенлерин белгилегендиле.  

Мен аны бла ушакъ этген кезиуде кёрюп тургъанма ол ишин, сабийлени да къалай сюйгенин. «Солуугъа кетсем, эки-юч ыйыкъдан тансыкъ болама. Бирде  ишибиз къыйынды, хакъыбыз азды, сабийле  айтханыбызны этмейдиле, окъургъа сюймейдиле деп да  тарыгъыучубуз. Болсада кеталмайбыз. Нек? Бек сюебиз да, андан»,-дейди Зайнаф. 

ЕГЭ-леге уа къалай къарайса, аны юсюнден бусагъатда кёпле кёп тюрлю айтадыла, деп да сормай болалмагъанма. «Аны иги амалгъа санайма. Сёз ючюн, элден чыкъгъан жашчыкъ неда къызчыкъ Москваны, Санкт-Петербургну, дагъыда къыралда атлары айтылгъан башха шахарланы белгили бийик окъуу юйлерине кирип окъусала аманмыды? Бир къырал экзамен а аллай онг береди. Сабий школда къадалып окъуса, анга бир тюрлю сынау да  чырмаулукъ этерик тюйюлдю»,-дегенди Зайнаф Хакимовна.