Къутхарыучуланы ишлерине иги багъа берилгенди

 КъМР-ни от тюшюуге къажау-къутхарыу службасыны  былтыр ишини эсеплери чыгъарылгъандыла.

Ачыкъланнганыча,  аны къуллукъчулары 415 кере чакъырылгъандыла отну ёчюлтюрге. Аланы кезиуюнде 756 инсан къоркъуулу болумладан къутхарылгъандыла, 25 инсанны жашауу сакъланнганды. Битеу да бирге 1 миллиард 695 миллион сом багъасы мюлк къорууланнганды.

Къутхарыучула 146 излеу жумушха къатышхандыла. Аланы кезиуюнде 54 адамны жаны сакъланнганды, 74 адамгъа болушлукъ этилгенди.

От тюшюулени асламы   мюлк сакъланнган ачыкъ жерледе, энчи юйледе тюшгенди. Сылтауланы арасында биринчи жерде отха къажау жорукъла толтурумагъанлары, уллу кёллюлюк, ток бла ишлеген затланы хайырланнганда бузукълукъла этилгенлери бла байламлыдыла.

Жыйылыуда ишчи къуллукъларын бийик даражада толтургъан бёлюмлени атлары да белгиленнгендиле. Лескен районда 14-чю номерли от тюшюуге къажау-къутхарыу бёлюм эм игиге саналгъанды.

Былтыр от тюшюуге къажау-къутхарыу службаны ишине иги багъа берилгенди. Кенгешни ахырында  быйылгъа борчла салыннгандыла.