Эллилеге бла къонакълагъа таплыкъгъа

Алгъаракълада «Къоркъуусуз эм тынгылы автомобиль жолла» миллет проектге кёре Бабугент – Мехлесхоз жолну жангыртып башлагъандыла. Аны чеклеринде  Мёчюланы Кязим атлы  орамны 1,4 километр тенгли бирине тынгылы ремонт этилликди. Мында эки  мектеп, межгит,  амбулатория, спорт ара, сабий сад  дегенча  социал магъаналы  учрежденияла  орналадыла. 

Бюгюнлюкде объектде жауун суу саркъырча  арыкъланы, таза суу баргъан быргъыланы алышып кюрешедиле. Аны бла бирге  кече жарыкъ болурча мадар да этиледи.   Ызы бла подряд организацияны келечилери жолну мурдорун  хазырлап, тротурла, бордюрла, улоу тохтагъан  комплексле  салып  бошасала, биринчи къат асфальт жаярыкъдыла.   

 Жол жангы излемлеге келиширча боллукъду.  Ол санда  къоркъуусузлукъгъа  аслам эс буруллукъду.  Зебралары бла светофорла, жоркъуну билдирген белгиле, ызла да  салынырыкъдыла эм темир буруула  тартыллыкъдыла.

Объект быйыл жайдан кеч къалмай хазыр болургъа  керекди.