Спорт

Черкесск шахарда дзюдодан, КъЧР-ни Правительствосуну башчысыны орунбасары А.М. Тебу улуну хурметине эришиу къуралгъанды. Анга 2003-2005 жыллада туугъан спортчула къатышхандыла.
Анда 90 килограмм ауурлукъ къауумда бизни республикадан Гайыланы Омар жетишимли болгъанды. Ол, битеу тюбешиулерин хорлам бла бошап, алтын майдал къытханды. Ючюнчю жерге Тембулат Кумыков (66кг.) чыкъгъанды. Аланы тренерле Д.А. Иванов бла А.М. Апхудов юйретедиле.

Республиканы Чегем шахарында, СССР-ни спортуну устасы, КъМР-ни физкультурасыны эм спортуну сыйлы ишчиси А.Н. Аджиевни хурметине аталып, грек-рим тутушуудан эришиу къуралгъанды. Анга Къабарты-Малкъардан, Къарачай-Черкесден, Ингушетиядан, Къалмыкъдан, Ставрополь крайдан, Москвадан бла Санкт-Петербургдан 2007-2010 жыллада туугъан 270 гёжеф къатышхандыла.

«Петербург жаз башы» деген ат бла шимал ара шахарыбызны «Комета» спорт комплексинде каратеден тёрели битеукъырал эришиу бардырылгъанды. Анга Россейден бла жууукъдагъы тыш къыралладан мингден аслам жаш эм абадан спортчу къатышхандыла.

Нальчикде стилевой каратени фестивалы бардырылгъанды. Анда тренер Къараланы Асланны къолунда жарау этген спортчула алчы жерлеге чыгъып къууандыргъандыла.
Алай бла каратени кумитэ бёлюмюнде алтын майдалны Созайланы Азамат, Къулийланы Аслан, Къараланы Рамазан алгъандыла. Къараланы Мадина всестилевой каратеде, кумитэде да биринчи болгъанды. Ала энди Саврополь крайны всестилевой каратеден биринчилигинде сермеширикдиле, ол а 13-14 апрельде боллукъду. Ставрополь крайны чемпионатына Жанкишиланы Герман да къатышырыкъды, ол республикалы эришиуде кюмюш майдалны къытханды. 
 

Владимир шахарны «Полярис» буз мекямында Россейни грек-рим тутушуудан биринчилиги къуралгъанды. Анга къыралны 63 регионундан 18 жыллары толмагъан 500-ден аслам спортчу къатышхандыла. 

Алгъаракълада «Track and Field» («Женгил атлетика») деген атлы  даражалы америкалы журнал къыш кезиуню эсеплерине кёре бек иги спортчуланы тизмесин туура этгенди. Женгил атлетикада айырмалыгъа бийикге секириуден дунияны тёрт къатлы чемпионкасы Мария Ласицкене бек игиге экинчи кере саналгъанды. 
Журналда жазылгъаныча, озгъан къыш кезиуде дунияны спортчулары 2.00  метр бийикликни 14 кере алгъандыла. Ма аладан тогъузусуна бизни жерлешибиз жетишгенди. Ол дагъыда озгъан сезонда  2.04 метрге секирип, барысын да озгъанды

Тырныауузну В.А. Губанов атлы «Геолог» спорт-саулукъ кючлеу комплексинде каратеден Къабарты-Малкъарны биринчилиги бла Тиширыуланы халкъла аралы кюнюне аталгъан эришиу бардырылгъандыла.

Нальчикде къатыш аскер единоборстволадан республиканы биринчилиги бла чемпионаты бардырылгъандыла. Элбрус районну олимпиада резервли спорт школундан гёжефле анда ахшы кёрюмдюле болдургъандыла, ала юч майдал къытхандыла. 16-17-жыллыкъ спортчуланы араларында кюмюш майдалны Шауаланы Хамзат (65кг.) къытханды. 

Онсегиз  жылдан абадан спортчулада уа Байзуллаланы Баттал (53кг.) бла Гюлюйланы Аслан (84кг.) доммакъ майдалла  алгъандыла. Жашланы тренер Арсен Губашиев юйретеди.
 

Нальчикде жюзюуден республиканы биринчилиги бардырылгъанды. Анга 70 жаш спортчу къатышханды. Ала 50 метрге эркин , брасс, аркъада эм баттерфляй халда жюзюп эришгендиле.
Турнирде кеслерини жыл санларында Дарья Антоненко, Никита Золоев, Бачиланы Ахмат, Датчиланы Тамирлан, Исмаил Пшигошев, Башиланы Дамир, Дамир Маршенкулов, Никита Золоев эм башхала алчы жерле алгъандыла.