Спорт

Москвада ЦСКА-ны спорт единоборствола мекямында «Киокушинкай-каратени федерацияланы содружестволарыны кубогу» деген III халкъла аралы эришиу къуралгъанды. Анга кёп къыралдан 300-ден аслам каратечи къызла бла жашла къатышхандыла.

Нальчикде Универсал спорт комплексде дзюдодан, милицияны подполковниги Джульбер Быковну хурметине аталып, тёрели эришиу бардырылгъанды. Анга СКФО-дан, ЮФО-дан бла Азербайджандан 465 адам къатышхандыла.

Минги тау жангызда  тамашалыкъ табийгъаты, къарлы тиклери бла белгили тюйюлдю, ахыр он жылда битеуроссей магъаналы курорт болгъанды, тыш къыралладан къонакъла да анда солуу кюнлерин ётдюрюрге излейдиле. Мында тау лыжа спорт да иги айныгъанды, тюрлю-тюрлю даражалы эришиуле дайым бардырыладыла. Аланы къурау, спортчуланы юйрениу - жарау этиу жыйылыуларын ётдюрюу бла уа Къабарты-Малкъарны тау лыжа спортдан бла сноуборддан федерациясы кюрешеди.   

Наркоманиягъа профилактика ишни толтурур, жаш тёлюню саулукълу жашау бардырыргъа кёллендирир муратда, волейболдан «Биз наркотиклеге къажаубуз» деген эришиу бардырылгъанды, анга Чегем районну школларыны окъуучулары къатышхандыла.

Былтыр Элбрус районну олимпиада резервли спорт школу ишлегенли 20 жыл толгъанды. Ол ачылгъанлай окъуна, умутландыргъан гёжефлени хазырлагъаны бла республикада, къыралда да белгили болгъанды. Анда жарауларын эки Олимпиаданы кюмюш эм доммакъ призёру Аккайланы Хаджимурат, Россейден каратеден дунияны биринчи чемпиону Аслан Губашиев, 2002 жылда къыралны эм иги каратечиси Руслан Сижажев, Россейни, Европаны бла дунияны чемпионатларында бла кубокларында, даражалы халкъла аралы турнирледе хорлагъан кёп спортчула башлагъандыла.

Ленинград азатланнганлы 75 жыл толгъанына аталып, Санкт-Петербургда каратеден "Невский факел" деген XXX битеуроссей турнир къуралгъанды. Анга къыралны 25 регионундан тюрлю-тюрлю жыл сандагъы 900-ге жууукъ спортчу къатышхандыла.

   Москвада «Олимпийская деревня-80» спорт комплексде грек-рим тутушуудан ара шахарны биринчилиги болгъанды, андан Къабарты-Малкъардан гёжефле тогъуз майдал келтиргендиле.

«Гитче-футболну – школгъа» деген битеуроссей проектни чеклеринде Нальчикде республикалы эришиу къуралгъанды.

    Тырныауузда боксдан халкъла аралы матч эришиуле бардырылгъандыла. Алагъа Россейни, Польшаны, Азербайджанны бла Къабарты-Малкъарны жыйымдыкъ командалары къатышхандыла.

   Нальчикде Универсал спорт  комплексде 18 жыллары толмагъан гёжефлени араларында грек-рим тутушуудан СКФО-ну биринчилиги бардырылгъанды. Анга Дагъыстандан, Ингушетиядан, Къабарты-Малкъардан, Къарачай-Черкесден, Шимал Осетия-Аланиядан, Чеченден бла Ставрополь крайдан 300-ге жууукъ адам къатышханды.